आज जलमंदिर येथे पुण्यातील युवा सामाजिक कार्यकर्त्या, Chevening – Duolingo Scholar आणि भारत सरकारचा राष्ट्रीय युवा पुरस्कार तसेच महाराष्ट्र शासनाचा राज्य युवा पुरस्कार प्राप्त दिक्षा दिंडे यांनी सदिच्छा भेट दिली.
दिक्षा दिंडे यांनी गेल्या नऊ वर्षांपासून अपंग व्यक्तींच्या हक्कांसाठी, सर्वसमावेशक शिक्षणासाठी आणि सुलभतेच्या हक्कासाठी अथक काम केले आहे. सध्या त्या एक Accessibility Auditor म्हणून कार्यरत असून, समावेशकतेसाठी प्रशिक्षण, धोरण सल्ला आणि जनजागृती हे क्षेत्र व्यापकपणे हाताळत आहेत.
भारताचं प्रतिनिधित्व करत त्यांनी युनायटेड किंग्डम, मलेशिया, इजिप्त आणि दक्षिण कोरिया येथे आंतरराष्ट्रीय व्यासपीठावर आपली प्रभावी भूमिका सादर केली. भारत सरकारचा राष्ट्रीय युवा पुरस्कार आणि महाराष्ट्र शासनाचा राज्य युवा पुरस्कार मिळवणाऱ्या दिक्षा यांना ब्रिटिश सरकारची Chevening Scholarship लाभली असून त्यांनी जगातील अव्वल संस्था Institute of Development Studies (UK) येथून पदव्युत्तर शिक्षण पूर्ण केलं. दिक्षा या Rehabilitation International Fellowship मिळवणाऱ्या जगभरातील केवळ १० विद्यार्थ्यांपैकी एक ठरल्या, ज्याअंतर्गत त्यांनी दक्षिण कोरियामध्ये अपंग धोरणे आणि जागतिक सुलभता यांचा अभ्यास केला.
त्यांचा संघर्ष, आत्मविश्वास, आणि समर्पण बघून मी मनापासून भारावून गेलो. विविध आंतरराष्ट्रीय परिषदांमध्ये भारताचे प्रतिनिधित्व करणे, TEDx आणि Josh Talks सारख्या मंचावरून आपला आवाज बुलंद करणे – हे त्यांच्या कार्यकर्तृत्वाचे प्रतीक आहे.
त्यांनी आपल्या कार्याची माहिती दिली, आणि भविष्यातील सामाजिक उपक्रमांसाठी सहकार्याची अपेक्षा व्यक्त केली.
त्यानंतर श्रीमंत छत्रपती सौ.दमयंतीराजे भोसले यांची देखील त्यांनी भेट घेतली. यावेळी त्यांच्या कार्याचे कौतुक करत, आवश्यक त्या सर्व प्रकारच्या पाठबळ देण्याचे त्यांना आश्वासित केले.
समाजात खरी समता निर्माण करायची असेल, तर अशा तरुण नेतृत्वाला साथ देणे हे आपले कर्तव्यच आहे.
दिक्षा यांचा प्रवास केवळ प्रेरणादायी नसून, नव्या पिढीसाठी एक नवी दिशा दर्शवणारा आहे.
याप्रसंगी माजी नगरसेवक श्री.बाळासाहेब ढेकणे, श्री.अमोल मोरे उपस्थित होते.
